Ocannu, pagu de fai: sa Die de sa Sardigna tocat a dda festai d’ogni unu in domu sua. Cancu annu fait, dd’iaus festada acorraus in d’unu cungiau de Giustitzia Antisommossa in Chirra, sa pròpia di’ chi iant arrestau a Doddore Meloni. Olliaus protestai cuntr’a s’ocupatzioni militari de sa Sardigna, ma s’Italia no si dd’iat permitiu. Is aterus annus, dd’eus passada fendi barchiteddas de paperi, ballendi a ballu tundu o fendi visitas tematicas in is logus de su fallimentu de su Piano di Rinascita. Totu cosas bellas, totu cosas chi fiant giustas po’ is tempus chi si biviant.

Imoi, perou, ddu at abbisòngiu de una manera noa de castiai a is

cosas. Is sardus no tenint mancu unu momentu, pùblicu e làicu, po’ s’auni’ totus in paris e festai s’identitadi issoru. S’atobiaus in is festas prus mannas de is biddas, chi funt meda ‘ortas de arrexini religiosa, ma no ddu at unu 14 de su mesi de argiolas a sa francesa, unu 25 de abrili a s’italiana, unu 11 de cabudanni a sa catalana.

Is storicus, pruschetotu cussus indipendentis, e is politicus dibatint ancora a pitzu de su sinnificau de sa Die de sa Sardigna e de sa rebellìa cuntr’a sa burocratzia e a su vicerei piemontesus. A cussa di’, podeus giai sensus politicus differentis meda. Ma no est custu chi imoi si interessat.

Po’ imoi si bastat a tenni una di’ po’ festai is sardus chi su 28 deabrili de su 1794, candu totu s’Europa fiat in rebellia, si funt pesaus po’ s’autoguvernu de sa terra issoru. E ddus olleus festai totus in pari, in d’una bella manifestada populari in is arrugas de sa citadi chi si fiat arrebellada cuntr’a is piemontesus, in Casteddu.

Ocannu no fait, andat beni. Ma in su 2021 ddui olleus provai? A calai in pratza totus in paris po’ giai su giustu arregordu a Angioy e cumpangius?

dp